Россе лорий Хьем боацача штаба кхетаче, дакъа лоацаш хилар вай мехкахой
Мехкарча унахцӀенон гӀулакхех йолча министерствон кулгал деш йола Ӏалбаканаькъан Зара, иштта дарбанчешкара лораш дакъа лоацаш хилар, Россе унахцӀенон гӀулакхех йолча Министерствон хьалха латтача Мурашко Михаила кулгал деш, гойтамга гӀолла дӀайихьача Россе лорий Хьем боацача штаба кхетаче.
Цига дийцар унахцӀенон оагӀонца дувзаденнараш хьакхелла хьаькъал юкъелоацаш дӀадахьарах. ИИ тахан латтача хана геттара чӀоагӀа даржаш да, пайда беш хургда из унахцӀенон оагӀонца а. «Керттера къамаьл даьр вар цига Россе унахцӀенон оагӀонцарча Министерствон кулгалхочун гӀонча вола Ваньков Вадим.
Хьакхелла хьаькъал юкъелоацаш дӀахьоча балхаца дувзаденнарех, шоаш теркалдаьрех дийцар Архангельскерча, Сахалински областерча лораша, иштта федеральни моттигаша – академика Бурденко Н.Н. цӀерах йолча нейрохирурге НМИЦо, Приволжски тохкама унахцӀенон оагӀонцарча университето, Алмазов В. А. цӀерах йолча НМИЦо», - хоам бу «Сердало» газетага моттигерча министерствос.
Къаьстта йоккха терко тӀайохийташ дийцар хьакхелла хьаькъал юкъелоацаш, унахой лазар гучадоаккхаш, дарба деш дӀахьоча балхаца хулача пайдах. Цу оагӀонцарча Ӏилманца лоархӀаме моттиг дӀалоацаш ба из оагӀув тахан.
ИИ дарбанчешкара хьал дикка тоадеш хургда, боаггӀача боараме болх дӀабахьар. Тахан санна кхоанарча вахаре а, лоархӀаме моттиг дӀалоацаш, лорий балха оагӀув хьбаллоацаш хургда ИИ.
