Моттигашкарча доал деча наьха кхетаче дакъа лоацаш ба Магӏалбика кхалера викалаш
Москве дӏахьош йолча ӏӏӏ Ерригача Россе «Зӏамига Даьхе – Россе низ» яхача муниципальни кхетаче дакъа лоацаш ва Магӏалбика кхален администрацена кулгал ду Къоастой ӏаддал-Хьамид, шийца цхьацца йолча юрташкара юртдаьй болаш. Йоккхача, лоархӏамеча кхетаче гулбеннабар мехка тайп-тайпарча миӏингашкара нах.
«Моттигашкара болх тоабара тӏехьа лоархӏаме долча гӏулакхех дийцар «Зӏамига Даьхе – Россе низ» яхача кхетаче. Хӏара шера цига гуллу федеральни, моттигашкара хьакимаш, бизнесменаш, юкъарлен оагӏонцара доакъашхой, тохкама болхлой, иштта кхыбараш а.
Муниципалитетий гӏулакх боаггӏача боараме хьаоттадара тӏехьа малагӏа болх лоаттабе беза, иштта тахан цу оагӏонца гучадаьннача кердадарех дувц йоккхача кхетаче гулбеннараша», - дийцар «Сердалога» Магӏалбика кхален администраце зарбан болх лелабераша.
Белгалде деза, укх шера дӏахьоча балха юкъе моттигашкара хьал тоадара тӏехьа эггара керттердараш, лоархӏамедараш чулаьцалга. Доакъашхошта юкъе доккха дика доаржадеш, массанена пайда беш, моттиг я ала деза цох. Технологически, доал дара оагӏонашта дикагӏа хургдараш, массане хьаллоацаргдараш белгалдир кхетаче.
