Туристаш тӀаозаш я вай лоаман моттигий Ӏалама а культуран а хозал
Россе мехкашта юкъе туризмаца дувзаденнараш дикка тоадеш латтача моттигех ба вай мохк. Вай мехкара лоаман моттигаш, цигара тамашийна хоза Ӏалам моллагӀча туриста дог тохадолийташ, цкъа веначун юхава дог отташ да. Тахан хьаделлаш латт керда туристически наькъаш. Мехка тӀалаттача хьаьший аьттув ба ГӀалгӀайчен доазон тӀара белгала йолча моттигашка гӀолла лела, из деррига довза.
«Дега чӀоагӀа тоам беш да, туристий вай мехкаца чам хилар. Ер шу доладелча денз 72 эзар совгӀа турист хиннав вайцига, дӀадахача шера хинна хьал теркалдича, 8, 3% лакхагӀа хул из укх шера. ХьатӀаухача хьаьшашта паргӀато хургьяраш кхоллаш къахьег тахан мехка. Карарча хана туристашка хьежараш 34 никъ ба, цу оагӀонцара болх дӀахо боаржабеш латт. Ер шу чакхдоалача хана, 130 эзар совгӀа туристаш ба вай мехкарча хозаленех бӀаргтоха бахка мегараш», - язду ший телеграмм-оагӀон тӀа мехкадас Келаматанаькъан Махьмуд-Ӏаьлас.
Лоаман моттигашкара цӀена фо, гонахьара тамашийна хоза Дала кхелла Ӏалам дог паргӀатадоаккхаш; «хах», аьнна, хетийташ да. Туристаш чӀоагӀа тамаш еш хьеж вай даьша еттача гӀалашка, къаман истори, даьшкара денз овла болаш хьадоагӀа Ӏадаташ довза чам хул цар. Цхьанна а моттига тара йоаца Магасера Барта ГӀала къаьстта йоккха терко тӀаозаш я; иштта дагалоаттама, сийлен мемориал; «Аьрзи» яха заповедник, ЦӀай-Лоама моттигаш…
Хьаьша тӀаэцара гӀулакх лакхача боараме дӀахьош хьадоагӀа вай мехка. Массаболча хьаьшаша зийна хӀама да из тахан. Россе моттигашта юкъе ший йизза моттиг дӀалоацаш, дуккхача миӀингашкара адам ший хозалца тӀаозаш, моттиг я вай мохк.
