Унахцӏенон болхлой профсоюза федеральни совгӏат делар
Профсоюзий болама даькъ тӏарча балха 120 шу дизара хетаяь, РФ унахцӏенон болхлой профсоюза Пленум дӏахьош, РФ унахцӏенон болхлой профсоюза Гӏалгӏай организацена федеральни совгӏат делар, яхаш, дийцар «Сердало» газетага цига дакъа лоацаш хиннараша.
«Йоккха кхетаче дӏахьош, вай мехка викал яр цига дакъа лоацаш Гӏалгӏай республикански профсоюзий организаце кулгалхо Барханой Фатима. Гӏалгӏайчен профсоюза болхлошта Сийлен грамота елар, «Дикача гӏулакхий никъ 2025» яхача халкъашта юкъерча проекте дакъа лацарах; иштта, кагирхой Даьхенцара безам совбоаккхаш, кхетам балара болх дика дӏабахьарах.
Дукхача шерашка из организаци Гӏалгӏай Республикан лорашта новкъостал деш хилар COVӏD-19 яха лазар долча хана, цо иштта хьаллоац лаьрххӏача тӏема операце бӏухой, цар гаргара нах», - аьлар хоамо.
Белгалду, ӏалихана Фатимас дика болх беш хиларах, таро хилар, мехка унахцӏенон даькъ тӏа профсоюза болх дегӏабоалабеш, из да лорий болхлой тешам лакха латтилга.
«Тхона из совгӏат сий дар а бехктокхам а ба. Оаха дӏахо а лорий болхлой оагӏув хьаллоацаргба, иштта кагирхой Даьхенцара безам совбоаккхаш йола программа дӏахьоргья», - аьлар Барханой Фатимас.
