Иштта дале а, буача кхачанна тӏахьожам лоаттабар болх бича бакъахьа ба. Из дар дукха ха йоаццаш Российски Федераце Президента дийцар. Кердачун Российски информационни агентствос (РИА Новости) беча хоамах, Путин Владимир цецваьннав ишколашка буача кхачанна дикалга хьожаш даьй-ноаной ца хиларах. «Хьадеш дар массаза а хилац дӏадеххача бесса. Цхьабакъда, каст-кастта даьй-ноаной кхачан дикалга хьажа дӏатӏа ца буташ хилар тамаш йолаш да. Хӏанад из иштта? Цох кхета хала да».

Ше координационни кабинета доакъашхошка къамаьл деш, Путина аьлар: «Арара боаггӏача бесса бӏеха колошкаш тӏаювхаш цу чу нах ахийта беза яхац аз. Цунна а ший санитарни оагӏув я».

Цо яхачох из доаггӏача бесса вӏашагӏдолла йиш я. «Тешшаме, даьй-ноаной комитето ишколашка кхачан дикала т1ахьожам лоаттабе беза», — аьнна тӏатехар цо.

Дӏдахача шера Гӏалгӏайчен юкъара дешара организацешка, цу юкъе кӏезига бераш чудоагӏараш а йолаш, масса долча кегий берашта мах боацаш дӏайха даар лоаттадора. Ишкола сайташка дӏачуувттайора кхачан меню. Цу хана ший балха тӏехь вай республике вена хиннача Российски Федераце дешара министра хьалхара заместитель волча Глушко Дмитре цу балха терко тӏаяхийтар. Из ваха хилар Назранерча, Элдарха-гӏалий тӏарча, Чимулхерча, Олгеттерча ишколашка. Цо дика мах оттабир, шоаш берашта кийчбергболча кхачан меню цар ши кӏира хьалха оттаеш хилара. Цо аьлар, таро халийта берий даьй-ноаной дикагӏа тӏахьожам лоаттабе. Чӏоагӏа лоархӏаме да уж цу юкъе дакъалоацаш хилар, хӏана аьлча, къаьстта да-нана да юххера мах хоадабер, — аьлар Глушко Дмитре.

Президента ловш да ишколерча балха юкъе дас-нанас дакъа а лаьца, болх чӏоагӏбар, иштта къонача дешархошта хьаькъал далара а, физически уж могаш хилара а ӏалашо яр, цахаддаш теркам лоаттабар.