Керда сийлен белгало йоалаяьй вай мехкарча халкъий лерхIама система дегIайоалаяра а шеръяра а.

Цу совгIатаца белгалдергда завода, предприяте, организаце, учреждене коллективай къахьегар. Сийлен знакаца белгалдоахаргда промышленносте, юртбоахама вахаре, экономике, Iилма-тохкаме, иштта культуре, искусстве, дешаре, унахцIено лораяре, спорте, физкультуре кхыйолча вахара оагIонашка мехкахоша даьха толамаш.

Хьалхадоаккх вай, хьалхагIа, советски хана, хиннай «Знак Почета» яха орден. Из луш хиннай производстве, Iилма-тохкама балха тIехь, паччахьалкхени, социально -культурни, спортивни, иштта граждански сийле яккхарахи даьхача доккхийча толамех.

Из доккха, сийлен совгIат деннад, ГIалгIайчен керттерча зарбанчен «Сердало» газета 1973 шера, СССР (а) Верховни Совета Президиума амарца.