Цӏенхаштта тоаяьчул тӏехьагӏа, бераш тӏаэцаш наӏараш хьайийллар пхе дешара моттиго
Мехкарча пхе дешара моттиге доккхий хувцамаш деш бола болх бизза кхоачашбир цу оагӏонцарча министерствос. Россе къаман проекташка гӏолла дӏахьош да уж беркате хувцамаш. Гӏишлон балхех йолча министерствос лакха терко еш, тӏахьожам беш чакхбаьккхаб беррига болх.
«Дезал» яхача къаман проектага гӏолла, боккха болх дӏахьош, тоайир йиъ берий беш, цу юкъе я Магасера «Фаьлг» яха берий беш, «Бӏенилг» яха Магӏалбикера № 2 йола берий беш, иштта Гӏажарий-Юртара «Селаӏад», Жӏайрахьара «Золушка» яха берий бешамаш. Цу балхаца цхьана чакхбаьккхар Магӏалбикера Чахкенаькъан Саӏида цӏерах № 1 йола гимнази тоаеш бола болх. «Кагирхойи бераши» яхача къаман проектага гӏолла дӏабихьа болх ба из. Хӏара моттиге, тӏера тхов хувцаш, гӏишлон куц эргадоаккхаш, чура кабинеташ таханарча ханага хьежжа тоаеш, къахьийгад. Къаьстта терко еш ба тахан, Наьсарера Ӏарпенаькъан Ювсапа цӏерах йола политехнически колледж тоаеш дӏахьош латтача балха. Болх чакхбаьннарг лархӏа мегаргдолаш ба тахан, цунга хьежжа дешара шу дӏадоладе а аьттув хилар цига», - дийцар «Сердалога» цу оагӏонцарча министерстве.
Гӏишлошъяра министерствон хьалха латтача Иленаькъан Мусас белгалдечох, вахара оагӏонцарча моттигий хьал тоадеш болх дӏабахьар тахан лоархӏамеча декхарех да. Цо теркалдир, хӏара моттигера болх лакхача боараме, хана йӏоахалца цхьаккха кхоачамбоацар гучадаргдоацаш дӏабихьа хила безилга. Цунга хьежжа, болх дӏахьоча хӏара моттиге деррига чакхдаллалца тӏахьожам лоаттабеш, деррига теркалдеш, лаьрххӏа оттабаь нах хиннаб.
