Туризм хьаллоацаш, болх дӀахьоргба мехка
2024-ча шера мехкарча Паччахьалкхено дӀабихьача балхах дувцаш, кхетаче хилар республикерча Парламенте. Премьер-министр волча Сластенин Владимира цига теркалдир, вайцигара туризм йоаржаеш дола гӀулакх хоалуш, айлуш латтилга, тӀалатташ бола туристаш хӀара шера дукхагӀа хулилга.
«ДӀадахача шера вайцига 125 эзар совгӀа туристаш хиннаб, 2023-ча шерара хьал теркалдича, 8,6% дукхагӀа хул уж. Номерни ганз 632 номер йолаш я, шера 20,3%-га кхоачаш айеннай из. Шолжа кхале вӀашагӀъеллай керда кхо маршрут (Ушкорт яхача моттига тӀабода никъ, Гаьл-ЧӀож яхача кхуркхолга тӀабода никъ, Зем-ГӀалан тӀабода никъ).
Белоруссерча туроператорашца моттиг дӀайовзийташ, экскурси дӀайихьай мехка, иштта Иранерча туроператорашца болх дӀахьош ба. Шоай болх дика шаьрбаь 42 экскурсовод-гид ва туристашца лелараш, цул совгӀа «ГӀалгӀай республика» - экскурсовода эшаш дола пособи» яха туристически гуллам ба боаржабеш», - йоах республикерча Паччахьалкхен кулгалхочун доклада тӀа.
2023-ча шера республике машинашцара туризм йоаржаергйолаш болх ба дӀахьош. Мехкара туризм хьаллацара тӀехьа лоархӀаме дакъа дӀалоацаш хургда из. Мехкадас соцам баь чай мела цӀалг хьадийлла, «Наькъашкара карта» яхача оагӀонцара болх ба дӀахьош.
«Туризми, хьаьша тӀаэцара гӀулакхи» яхача къаман проектага гӀолла дӀайихьай «Фусам-нана» яха яхьаш, «Дезала тоаба», «Кинжал 2024» яха фестивалаш. Уж еррига кхетаченаш, Россе тайп-тайпарча миӀингашкара туристаш тӀаозаш, мехкарча туризма хьал доаржадеш я.
