Къаман проекташ кхоачашъяра цӏенхаштта тӏахьожам лоаттабу
Мехкарча кулгалхоша лакха терко лоаттаеш да, къаман проекташ йоаржаяр. Хӏара дийнахьа дӏахьоча цу оагӏонцарча балха терко яр, тахан лоархӏамеча декхарех да. Карарча хана 62%-га кхоачаш рузкъа да цу балхага дӏадахар. 2026-ча шера къоастадаьча 5 млрд 729 млн сомах 3 млрд 557 млн сом гаргга ахча дӏадахийта даьннад балхага. 95%-га кхоачаш, болх чакхбаьккхаб цу оагӏонцарча чӏоагӏонца белгалдаьчох.
«Россе Президента Путин Владимира соцам баь, йоаржаяьча пхе къаман проекташцара болх Россерча юкъерча боарамал лакхагӏа латташ дӏахьош да вай. Къаьстта из зувш да «Дӏаьха, кадай вахар» яхачунца - 70,3% , «Пайда беш йола экономика» яхачунца – 61, 8%, иштта «Экологически оагӏонцара паргӏато» - 61,8%.
Цу юкъе я Кердача Реданте, Пхьилекъонгий-Юрта, Гӏажарий-Юрта, Галашка хьалъяь ишколаш, иштта наькъаш, шахьарашкара, юрташкара моттигаш тоаяр, дешара моттигашка кулг тохар, керда автобусаш, Наьсаре ӏам тоабеш дӏабихьа болх, иштта кхыдола дукха гӏулакхаш. Тахан эггара керттердар массайолча моттигашкара болх тӏехдика чакхбаьккха хилар, цхьаккха кхоачамбоацар цанийсдалийтар», - белгалдир вай мехкадас Келаматанаькъан Махьмуд-Ӏаьлас.
Республикан Кулгалхочо паччахьалкхенна тӏадиллад; болх дӏахьош латтача моттигашка хӏара денна тӏахьожам лоаттабеш хила, аьнна. Нагахьа цхьайолча моттиге болх кегабенна, боаггӏача боараме дӏа ца бодаш, юххьанца йиллача хана тӏехьакхувш ца хуле, хьакимаш тахка дезаш ба малагӏча бахьанех из иштта хиннад, малагӏа гӏалатло я цу юкъе. Хӏара моттигера болх лертӏа хургбар де деза цар, беррига низ ураоттабаь.
