Квартираш йола цIенош тешам болча фирмашка мара тоадайтаргдац
Республикера квартираш йола цIенош лакха тешам болаш, боаггӀача боараме шоай болх дӀакхахьарца белгалъяьннача фирман болхлошка мара тоадайтаргдац. Из хоам «Сердалога» бир Мехкадаь зарбан болх лелабераша.
«Энергетикахи ЖКХ оагӀонахи йолча министерствос лакха тӀахьожам беш дӀахьу из болх. ГӀишлошъяра балхаш дӀакхухьаш йолча моттигашта юкъе яхьаш увттаеш, дӀабахьа лерхӀ из болх.
ЦӀенош тоадара болх лакхача боараме хила безаш ба! Тха проекташка дакъа лаца йиш йолаш хургба шоай болх эггара дикагӀа чакхбоаккхаш бараш, гӀишлой балхаш лерттӀа дӀакхухьараш», - белгалдир вай Мехкадас Келаматанаькъан Махьмуд-Ӏаьлас, цу лоархӀамеча гӀулакхах дувцаш.
Яхьаш дӀакхахьаро шоай болх боаггӀача боараме, бехктокхаме чакхбаккхара тӀаозаргба гӀишлош тоаеш лелараш, хӀаьта наха баха лерттӀа цӀенош кхоачаргда.
Иштта Мехкадас теркалдир, 2043-ча шерга кхаччалца дӀахьош болча квартирех латта цӀенош тоадеш болча боккхача балха МагӀалбикера, Наьсарера кхо цӀенош юкъедолхилга. КӀалхара лард чӀоагӀъеш, тӀера куц тоадеш, иштта кхыдола хувцамаш деш, къахьегаргда цига.
