«Пхьилекъонгий-Юртарча» подстанце лоаттаергья республиканна ток
«Къилбаседа Кавказа россетий» - «Ингушэнерго» яхача оагӀоно 110/35/10 Кв «Пхьилекъонгий-Юрт» яхача подстанцех дӀахотташ латт республикера бахархой. Цу моттиго токаца Ӏалашвеш хиннар 67 эзар совгӀа саг вар: Илдарха-ГӀала, Дошлакъий-Юрт, Аьлтий-Юрт, Эбарга-Юрт, Яндаре, Юкъера Ачалкхе, ГӀаьзе-Ков. Иштта, цу моттигах дӀахетта яр 63 лоархӀаме моттиг.
Царна юкъе яр дарбанчеш, дешара моттигаш, хий хьалу моттигаш, насосий станцеш, иштта кхыяраш. 80 МВА йола «Пхьилекъонгий-Юрт» яха подстанци таханарча хано дӀадеххача тайпара кийчъяь, деррига а лакхача боараме долаш я. «Ингушэнерго» яхача филиала кулгал деча БӀарахой Рашида белгалдечох, «Старая» яхача подстанце ток телаш хиннараш «Пхьилекъонгий-Юрт» яхача подстанцех дӀахотташ, хьалхарча аргӀагӀа бола болх ба из. «Старая» яхар 1955-ча шера денз болх беш я. Цигара тока гӀирсаш шоай ха йиа даьннад. Керда проект чӀоагӀа лоархӀаме я вай мехкара вахара-экономикан хьал тоадара тӀехьа. Тока гӀулакх дикка меттадоаладергда кердача подстанце». Из гӀулакх чакхдоаккхаш, 35 Кв кхо километр совгӀа диъ така дола, 10 Кв 1, 4 километр шиъ керда кабель буллаш такаш хьадаьд тока оагӀон болхлоша.
Деррига чакхдаьлча, «Пхьилекъонгий-Юрт» яхача подстанцегара ток ийеш хургба 27 эзар совгӀа бахархой, 15 лоархӀаме моттиг. Ер шу чакхдалеле, деррига балхаш йистедаха лерхӀ тока оагӀон болхлоша.
