ГӏалгӀай КСВО штаба кулгалхочо дакъа лаьцар «Сенежа» кхетаче
ГӏалгӀайчен моттигерча Даьхен бӀухой дезала Комитета штаба кулгалхочо Эсамарзанаькъан Ӏалаудина дакъа лаьцар проекта кхетаче дӀахьоча, из вӀашагӀъеллай федеральни, моттигерча КСВО хьалхалаттарий даькъ тӀа. Кхетаче дӀахьош яр «Сенежа» пхьоаллен даькъ тӀа. Дукхача профессиональни дегӀаахара йолча дешара программашца йовзаш я из.
«Профессиональни дегӀаахара из семинар сона лоархӀаме яр. Сона цох дика пайда баларал совгӀа, айса санна уйла еш бола новкъостий а нийсбелар цига, царца цхьана оаха дӀахьоргья тхоай кердадараш юкъедахара йола балха оагӀув. Кхетачен лакха мах оттабеш дар цига дакъа лоацаш федеральни штаба кулгалхо Белехова Юля хилар, цо дика йовзийтар гулбеннарашта ший балха говзал. Цо даьча къамаьло таро елар мехка викалашта лоархӀаме хаттараш довза», - аьлар «Сердало» газетага Эсамарзанаькъан Ӏалаудина.
Кхетачен программа белгалйоалаш яр дукхача оагӀонашца. Доакъашхоша дийцар профессиональни бувзамаш чӀоагӀдара хаттарех, КСВО штаба болх дикагӀа тоабарах. Цига дакъа лоацаш хиннарий хӀаране таро яр кхыча мехкашкара балха новкъостий бовза, шоайла балха говзал эца, дӀахо болх вӀашагӀболлара таронаш йоаржае.
Эсамарзанаькъан Ӏалаудина яхачох, кхетачен болх дика вӀашагӀбеллабар, пайда эца таронаш а йолаш. Берригаш а кийча бар чоалхане хаттараш кхоачашде, доакъашхой шоайла хьаллоацаш хиларо, царна таро елар, берригача мехкарча бӀухой дезал хьаллацара йола КСВО федеральни, моттигерча тоабашта дика хьалаш хьакхолла.
