УнахцӀенон гӀулакхех йолча министерствон кулгалхо йоккхача кхетаче дакъа лоацаш хилар
Федераце Советага, Росконгресса ганзага хьалхале йолаш, Москве дӀайихьача «Нах унахцӀена хилара тӀехьа ба кхалнах» яхача йоккхача кхетаче дакъа лоацаш хилар вай мехкарча унахцӀенон гӀулакхех йолча министерствон кулгалхо Ӏалбаканаькъан Зара.
Из хоам «Сердалога» бир Минздрава зарбан болх лелабераша. Цига къамаьл дир Федераце Совета кулгал деча Матвиенко Валентинас, РФ унахцӀенон гӀулакхех йолча министерствон хьалхалаттача Мурашко Михаила.
«Вахар хьинаре дӀадахьар» яха керда къаман проект йоаржаярах дийцар министра, теркалдир из гӀулакх къаьстта чӀоагӀа юрташка эшилга.
«Цу проектага гӀолла боккхагӀбарий унахцӀено меттаоттаеш йола керда 200 моттиг хьаелларгья вай», - аьлар Мурашко Михаила. Форуме гулбеннабар бизнесменаш; политически, юкъарча оагӀоний доакъашхой, иштта унахцӀенон хьал тоадара тӀехьа къахьегаш бараш. Иштта йолча кхетаче дакъа лацар лоархӀаме долга белгалдир вай министра.
«УнахцӀенон вахаре даржаш дола кердадараш довзара тӀехьа, эшаш да цу моттигашка дакъа лацар. Хьалхашка латташ дола кхоачамбоацараш юстардаха дикагӀа аьттув боал цу тайпарча наькъаца. Доккха баркал оал аз ер санна йола кхетаченаш хьаллоацаш, шоай балхацара говзал лакхъеш къахьегаш болча лорашта», - белгалдир Ӏалбаканаькъан Зарас.
