Халкъа кхоллама цӀен кулгалхошта, дайзар дикагӀа дола балхаш
Россе цӀихезача артисткай Йовлой К. А. цӀерагӀча Республикан халкъа кхоллама цӀен кулгалхо Котанаькъан Марем, цигара исбахьален кулгалхо, искусствай гӀоръяьнна болхло АбдурзаковгӀар Аьсет дакъа лоацаш хилар кхетачен балха юкъе, из хетаяь яр Къилбаседа-Малхбузехьара, Къилбаседа Кавказа, Къулбехьен федеральни куран тӀарча культурех пайда эцара дешашта. Гуча-къамаьл деча кепара дӀахьош яр кхетаче, цунна керте яр проектни офиса кулгалхо, Российски паччахьалкхен лаьрххӀа йолча искусствай академе ректор Пахомова Елена.
«Кхетаче вӀашагӀтехача кхоллама лабораторе балхах дийцар АьдагӀий Республикан, бӀаргса доацача наха лаьрхӀача библиотекан ИТЛ кулгалхочо Корниенко Иринас, ГӀаьбартой-Балкхарой халкъа исбахьаленна карагӀдоалачун, кулгаговзала республикански центра кулгалхочо Урусов Аслана, Калининградски областа, Гурьевски доал деча куран тӀарча администраце культуран, кагирхой гӀулакхашта, туризманна, спортах йолча урхалленен кулгалхо Кульманская Светланас, Ӏилман болхлочо, Волгоградерча исбахьален искусствай Машков И.И. цӀерагӀча музея ИТЛ кулгалхочо Лучкина Еленас, Архангельски «Соломбала-Арт» яхача культуран центра менеджера Шестакова Аллас. Шоаш болча моттигашка дикагӀа тӀаийца а довзаш а долча балхех дийцар цар», - аьлар «Сердало» газетага ГӀалгӀайчен РДНТ кулгалхочо Котанаькъан Марема.
Белгалду, ГӀалгӀайчен кхоллама лабораторе, «Дика гӀулакхаш дар» яха болх ба юкъебоалабаь, цу лостамагӀа Юкъерча Ачалкхе, цахадаш могашал эшаенна бераш топпарах хӀамаш хьае Ӏомаду. Из проект хьаеллаш ший дакъа юкъедена а, ше дикача оагӀорахьара дӀагойта а да ГӀалгӀайчен халкъа кхоллама цӀа.
