ГӏалгӀайчен эрсий театр дакъа лоацаш хилар, «Театра хана йӀоахал» яхача боламе
Эрсий паччахьалкхен ашарий-драматически театро дакъа лаьцар «Театра хана йӀоахал» яхача дикача гӀулакха боламе, из вӀашагӀбеллабар, Россе театра болхлой Союза ГӏалгӀай даькъо. Кхетаче дӀайихьар ГӏалгӀайчен берий театре, из хетаяь яр цӀихезача денна- Россе театра болхлой Союза 150 шу дизара.
«Сайре белгалйоалаш яр кхоллама тӀехьален сий деш хиларца, дӀадахача ноахалаша йита говзанчий сийрда лар лархӀарца. Царех хӀара саг таро йолаш вар дӀайхача дешаца дагабоха шоашта уллув лаьтта кхоллама болхлой, иштта шоашта юкъера дӀабахараш, цар дита доккха кхоллама дика хьоахаде. Цига керттера моттиг дӀалоацаш хиннар дар сцена ветеранаш къаьстта безбеш хилар. РФ театра болхлой Союза ГӏалгӀай даькъа кулгалхочо Ховтанаькъан Дугурхана, баркал оалаш, каьхаташ, совгӀаташ делар царна. Из хилар царна массазарча безама белгало, иштта царна хьажархоша оалаш дола баркал, укх массехк шера цар мехка культуран мах бараш лорадеш дӀахьош болча балхах», - хоам бу «Сердало» газетага ГӏалгӀайчен РГМДТ.
Из болам дӀахьош хиларо таро елар царна шоайла дагабовла, театра Ӏадаташ дувца. Цо вӀашагӀтехар сцена тӀарча искусствон ветеранаш, цар хьакхолл театра кхоллама кӀийле; театра кулгалхой, цар белгалду мехка культуран дакъа. Цу цӀихезача артисташа дукхача хана денз тӀаоз хьажархой безам, цар кхебу къона артисташ, говзанчаш, ГӏалгӀайчен театральни искусствон хургдар хьакхоллаш.
«Театра хана йӀоахал» яха болам бокъонца дола цӀай хинна дӀаэттар, цига хӀара гойтам, хӀара дош, кулга оамал хьалхадоаккхаш яр юкъарлон вахарера театра мах бараш. Боламо хьагойтар ГӏалгӀайчен театра искусство дегӀайоагӀаш хилар, цун чӀоагӀа кӀийле хилар, из дерига а да; начӀал дола говзанчаш, кагирхой вай хилар бахьан долаш.
