Россе Президента СКФО викала гӏонча ва вай мехка вена
Россе Президента СКФО викала гӏонча Надыкто Владимир ва республике балха гӏулакхаш кхоачашде вена. Мехкарча хьакимашца Наьсаре, иштта Шолжа-Шахьара, Наьсарен кхале хьалъеш, тоаеш латтача моттигий балхага хьожаш хилар из.
«30 сага ӏовижа дарба де аьттув луш, 100 совгӏа саг цхьан дийнахьа тӏаэцаш хургйолча, ӏаьлий-Юрта хьалъеш латтача участкови дарбанчен болх мишта дӏабодаш ба хьожаш ва хьаким карарча хана. Иштта тоадеш латтача наькъашка, вахара оагӏонцарча кхыйолча моттигашка хьожаш чакхваргва из», - йоах «Сердалога» мехкарча паччахьалкхера кхаьчача хоамо.
Надыкто Владимир вайцига кхачара юкъе лоархӏаме моттиг дӏалоацаш хургья моттигерча министерствошца, администраце кулгалхошца, иштта кхыйолча моттигий хьакимашца дӏахьоргйола кхетаче. Цига дувцаргда РФ Президента чӏоагӏонца йоаржаяьча, къаман проекташта юкъейолхаш йолча керттерча реcпубликан программех.
