Терроризма, экстремизма духьалара семинар дӏайихьар вай мехка
«Тхо террора духьала да» яха семинар дӏайихьар ӏаьлий- Юртарча культуран Цӏагӏа. Из хоам «Сердалога» бир Наьсарен кхален администраце.
ӏаьдала болхлой; дешара, кхоллама оагӏоний моттигашкара къахьегамхой бар дакъа лоацаш хиннараш.
«АТК оагӏонна кулгал деча Хьоашаланаькъан ӏалихана белгалдир, тахан из зулам доаржадераша керда хӏамаш юкъедаьхалга. Интернета оагӏонашка гӏолла шоай тийшаболх дӏахьоча цу бӏехача зуамхоша психологически оагӏонца низ бу наха; уж ӏехабе, тувлбе, шоаш дувцачох тешабе гӏерташ», - йоах тхога бенача хоамо.
Тахан вай йоккха терко лоаттаеш къаьстта чӏоагӏа лорабе беза къонабараш, хӏана аьлча зуламхошта шоай бӏеха болх боаржабара тӏехьа дукхагӏа дагабоахкараш кагирхой ба. Терроризм яхача зулама юкъеваха саг ший ираз доадаьрех волга хьалхадаха деза вай тахан кхувш латтарашта.
Интернета оагӏонашка гӏолла из хӏама дӏадахьа гӏертарашца цхьаккха тайпара бувзам лелабе, цар яхар теркалде, хьаэца йиш йоацилгах дувца деза цӏагӏа, иштта дешара моттигашка. Моллагӏа тешаме ца хета хӏама зийча, ӏалаьмате сиха ӏаьдала болхлошка хоам бе безилга дӏадувца деза.
Иштта цига шоай говзал гойташ хилар культуран Цӏагӏарча «Театрон» яхача театральни студера доакъашхой, «Наьсарен кхален гимназера» халхара, иллей тоабан доакъашхой; № 2 йолча «Берий дуне» яхача берий бешара «Теремок» яха тоаба. Цу йоккхача семинарага кийчо яьрашта баркал кхайкадеш, чакхъяьлар кхетаче.
