Вайцигарча ялх тхэквондисто Халкъашта юкъерча яхьашка толамаш даьхар
31.05.2024 09:32
ГӀалгӀайчен ялх тхэквондисто дакъа лаьцар Селашкахьа дӀахьош хиннача Халкъашта юкъерча тхэквондох йолча яхьашка, цар яьхар тайп-тайпара майдилгаш, яхаш, дийцар «Сердало» газетага ГӀалгӀай Республикан физически культура, спорта Министерствон зарбан болх лелабераша.
«Джафаров Мухьмада цӀерагӀча спортивни ишколе дӀахьош хиннача яхьашка, 8 моттигера венача 450 спортсмена гойтар латара говзал. Вай вӀашагӀтехача тоабанна чубоагӀаш бар дикагӀа бола спортсменаш.
Лакхарча лагӀа тӀа эттар Циздой Мансур (41кг), МутаӀаланаькъан Ӏаддал-Малик (33 кг), Мержой Ӏаддал-Малик (41кг). Тебой Мухьмада (32 кг) дотув даьккхар.
КхоалагӀа моттиг яьккхар Къамурзой Ӏийсас (55кг), Хидиранаькъан Абукара (53кг)», - йоах хоамо.
