Дешархоша дагалоаттаю къаман турпалхой цӀераш
ГӀалгӀайчен дешархоша, боча йолаш, дагалоаттаю къаман турпалхой цӀераш. Укх наькъа «Хьалхарчар Болама» хьинар дараш, юкъара-пайдане болх дӀахьош ба, волонтерий толамаш яхача проекта чубоагӀаш, яхаш, дийцар «Сердало» газетага из болх вӀашагӀбеллараша.
«Проекта чудоагӀаш, Илдарха-ГӀалан №1 йолча ишкола дешархоша, дагалоаттама пхе моттиге лостам беш, балхаш дир. Лоаццача хана, ондаргаша массехк моттиг цӀенйир.
Уж дӀаболабелар, Сийлахь-боккхача Даьймехка тӀема доакъашхочун, Яндаре вахархочун дагалоаттама сийленг долчара. Кхы кӀезигагӀа къахьеганзар цар Шолжа-Шахьарера «Дагалоаттама, сийлен» парк йолча даькъ тӀа, иштта «Советски Ӏаьдал доаккхаш лаьттарий» сийна оттадаь улг долча а», - аьлар хоамо.
Лостам бара балхаш чакхдаьлар, Сийлахь-боккхача Даьймехка тӀема парке, Илдарха-ГӀалий тӀа Граждански тӀема доакъашхошта дегӀа сийленг долча моттиге.
