Вай дешархой дакъа лоацаш ба, «Кхерамзлен ишкол» яхача яхьашка
Къилбаседа ХIирийчен Алагирски кхалене дIайихьар мехкашта юкъера «Кхерамзлен ишкол-2024» яха Ерригроссе яхьаш. Цхьа бIаь совгIа саг вар укхаза, ерригача Къилбаседа Кавказа федеральни даькъ тIара, шоай тоабаш йолаш. Яьннача ханага хьежжа, шин даькъа бийкъабар ГIалгIайчен доакъашхой: «Кавказа Аьрзеш» (СоагIапчара №30 йола юкъера ишкол), «Лоам» (Инаркъера №12 йола юкъера ишкол).
«Яхьашка дакъа лоацачар гойта дезаш дар цIи йоаяр, хи чура саг кIалхарваккхар, ше кIалхарвалар, иштта кхы дуккхадараш. ГIалгIайчен командаша йиълагIа моттиг яьккхар», - аьлар «Сердало» газетага мехка дешара, Iилман Министерствон зарбан болх лелабераша.
«Кхерамзлен ишкол» яха Ерригроссийски яхьаш дIахьош хилар бахьан да, кхувш боагIарашта юкъе могашал чIоагIъяр, эттача халача хьалашка мишта хила беза царна хьалхадаккхар. Кагирхой цу тайпара кийчбу мохк лорабе, моллагIча эттача чоалханерча хьалашка лорабала, цу юкъера арабовла.
