Ишколай президентий Ерригача Россе кхетачен юкъе дакъа лоацаш ба вай дешархой
07.04.2025 11:55
Вай мехкара дешархой дакъа лоацаш ба ишколай президентий Ерригача Россе кхетаче. Из хоам «Сердалога» бир «Бералла наькъаш» яхача проекта зарбан болх лелабераша.
«Яхьаш дика дӀайихьача хержарашца бар Юкъерча Ачалкхен № 15 йолча ишкола дешархо Поаланкой Ясмина, Эккажкъонгий-Юртарча № 2 йолча ишколера Кхоартой Муслим. Берашта хьалхаяьннар я ишкола кулгалхочун гӀонча йола Овшанаькъан Танзила», - йоах тхога бенача хоамо.
Ишколан вахарера керттера хаттараш дашха аьттув лу кхетачено берашта. Тахан юкъедаьха кердадараш довзийташ, кагирхой шоай моттиг езаш, лоархӀаш хилара тӀахьехаш болх дӀабихьар спикераша.
