Наьсарен кхален дешархошта довзийтар эрсий матрёшкай истори
«Дешархошта лаьрхӏа культура» яхача Ерригроссийски культурно-дешара проект кхоачашъеш, Наьсарен культуран Цӏагӏа «Эрсий матрёшка - Россе хӏайкал» яха литературно-ашарий композици дӏайихьар. Из кхетаче дӏаяхьара керттера маӏан дар, кхувш йоагӏача тӏехьен культуран мах бараш довзийтар.
«Кхоллама кхетаче дӏахьош яр Исмейланаькъан Лема, Кӏуренаькъан Ӏайна. Программа чудоагӏаш, РДК исбахьален кулгалхочо Кӏуренаькъан Ӏайнас из дахчан теник хьаяьнна тамашийна истори довзийтар. Дешархошта дайзар из Россе эггара чӏоагӏагӏа йовзаш йола теник мишта хилар; цул совгӏа дезала ӏадаташ лорадеш дола хӏайкал санна эрсий фусамашка из лелаеш хилар. Кхетаче дӏахьош хинначо иштта дийцар, матрёшка кеп, цун чура зӏамига теникаш чӏоагӏа тӏехье хьакхоллара белгало хиннилга, из иштта хьадоагӏаш да дукхача бӏаьшерашка денз», - аьлар «Сердало» газетага Наьсарен кхален культуран Цӏен кулгалхочо Дзейтанаькъан Тимура.
Довзара экскурси яьнначул тӏехьагӏа, дӏайолаелар программа интерактивный оагӏув, цига берий таро хилар шоай начӏал гойта. Къоаламаш, басараш бедехка, уж болабелар каьхата тӏа матрёшка сурташ дехка.
Берашта дагаухар матрёшкашта хетадаь дола дукха хӏамаш: байташ, частушкаш, дагардергаш.
«Сакъердаме косынка» яха ловзар, иштта спортивни ловзараш хилар цига, цо вӏашагӏтехар доакъашхой, царна дукха белам белар. Эггара чӏоагӏагӏа безам тӏабодаш яр «Сакъердаме матрёшка» яха яхь дӏахьош, цига бераш чӏоагӏа гӏаддахадар.
Наьсарен РДК дӏахьош хинна кхетаче безаме а, берашта эшаш а яр. Керттера да - ловзарашка гӏолла, матрёшка тахан а ноанала, хьувкъама, йӏовхала, дезала чӏоагӏон белгало хилар берашта довзийтар.
