Гӏалгӏайчен тохкама комитето суде дӏадахьийтар, ӏалама министерствон викала кхаъ бала гӏертарах дола гӏулакх
Гӏалгӏайче гӏолла йолча СКР лоархӏаме гӏулакхех йолча урхаллен хьалхарча даькъа тохкама болх лелабераша чакхдаьккхар ши саг юкъе вола уголовни гӏулакх. Уж бехке бу РФ УК 3 д. 30 ст. п. «а», 4 д. 291 ст. (балха тӏа волча сага кхаъ бала гӏертарах, шоаш харцахьара гӏулакх дар къайлахьоргдолаш).
«Тохкама болх лелабераша яхачох, 2022 шера цу наха 100 эзар сом дӏадахьийтар Гӏалгӏайчен ӏалама тароний, экологен Министерствон викала гаргарча сага банка карта тӏа, из лаьрхӏа дар Магӏалбика кхален даькъ тӏа ӏалама мах бар лочкъадеш, шоаш деш дола зулам къайладахьарах кхаъ балара. Бакъда шоаш дагалаьца зулам цар чакхдаккха таро хиланзар, хӏана аьлча цу сага кара дацар из хаттар кхоачашдар. Хьалхагӏа, тохкамхоша могадир из чуволлар», - аьлар «Сердало» газетага Гӏалгӏайчен тохкама комитете.
Из тохкама болх дӏахьош ма дарра гучадаьлар из саг бехке хилар. Хӏанз из болх чакхбаьлар, цун кӏийленга ядаш йола материалаш суде дӏаяхьийтар Гӏалгӏайчен ӏалама тароний, экологе Министерствон болхлочунна духьала.
Из бехкеву РФ УК 3 д. 159 ст. дӏадехаш ма-хиллара, ший балха тӏагӏолла зе де бокъонаш телхаярах.
Из болх тохкаш новкъостал даьр я Россе ФСБ моттигера Урхалле.
