СК болхлоша студенташца кхерамзленах лаьца къамаьл дир
Гӏалгӏайче гӏолла йолча Россе тохкама комитето хьехама болх дӏабихьар дукхача доакъоех латтача колледже. Из болх вӏашагӏбеллар терроризма, экстремизма наькъех колледжа кагирхой лорабе лаьрхӏа цу боахама юкъарлон-политически балха даькъ тӏарча гӏончас Горчхананаькъан Ӏумара, кадрай отдела кулгалхочо Йовлой Ахьмада. Цу къамаьла чудоагӏаш СК викалаша ма дарра довзийтар терроризма, экстремизма наха дахьаш дола зулам, цун ийрча наькъаш, цар довзийтар кагирхой цу наькъ тӏа боахаш хилара бахьанаш, уж цох лорабала безар хьалхадаьккхар.
«Тохкама урхаллен болхлоша белгалдир, гаьна волаш зулам даьдар аьнна, цох саг мукъавоалийташ моттиг яц. Хоадам болаш, берашта хьалхадаьккхар бехктокхаме хила дезилга, ца доагӏа ийрча гӏулакхаш цалеладарах, экстремистки наькъ тӏа ца боалаш лорабаларах», - аьлар «Сердало» газетага Гӏалгӏайчен Тохкама комитета зарбан болх лелабераша.
Тохкама комитета эпсараша белгалдир, кагирхоша къайладахьа йиш яц тешаме доаца гӏулакхаш, моллагӏа шоаш дегабуам беш йола моттиг нийсъелча, цар сиха хоам бе беза бокъонаш лораеча ӏаьдалга.
Кхетаче вӏашагӏъеллаяр интерактивни кепара. Хӏаране таро яр шийна хеташ дола хаттар дала, цун хоадам болаш профессиональни тохкам бе. Цу тайпара, шоайла тешам луш дола къамаьл хиларо таро лу, кхувш йоагӏа тӏехье нийсача наькъ тӏа яккха, цунна кхоана духьалдаргдола хьал тахан дӏадовзийта.
