Ерригача Россе семинаре дакъа лоацаш хилар, мехкарча кагирхой гӏулакхех йолча Комитета болхло
«Роскагирхой.Гранташ» яха яхьаш йоаржаяра хетаяьча Ерригача Россе семинаре-кхетаче дакъа лоацаш хилар, кагирхой гӏулакхех йолча Комитета болхло вола Бузуртанаькъан Муса. Россе кагирхой столица лоархӏаш йолча Смоленске хилар, боккхача мехка проекташ увттаерий кулгалхой, моттигашкара балха лостам телараш цхьан доазон тӏа гулбаь семинар. Доакъашхой керттера декхар яхьашцара болх хӏара моттигерча кагирхоша кхетабеш хургболаш хьаоттабарца дувзаденна дар.
«Дукха хӏама чулаьца программа яр из. Тайп-тайпарча моттигий ярмарка хилар цига, Калининградера Владивостокага кхаччалца йолча миӏингашкара пайданедараш довзийтар, иштта лоархӏаме сесси, дешара оагӏув хилар. Къаьстта терко йир цу гӏулакха хьалхалаттарий балха, тоабашта кулгалдара. Программан юкъе лоархӏаме хилар тематически клубаш – доакъашхой декхараш кхоачашдара болх цхьана тоабар. Кагирхой хьехамчий болх мишта хила беза, кагирхой моллагӏча хӏаман дикагӏа тӏаозаргболаш сенгара дӏаволавала веза, дийцар семинаре», - йоах «Сердалога» кагирхой гӏулакхех йолча Комитетера бенача хоамо.
Белгалдечох, Смоленске вахаро дукха кердадараш довзийтар Бузуртанаькъан Мусайна. Республикера кагирхой оагӏонцара болх дикагӏа тоабе накъадаргдола хӏамаш дар цо Россе кхыча моттигашкара хьаийцараш.
