«Балха шоатта ди дӀадахьаро таро лу хӀара денна беш болча балха тӀеравала, цӀенача фега ха дӀаяхьа, ший балха новкъосташца дагавала. Уж мо йола моттигаш чӀоагӀа лоархӀаме я гонахьара Ӏалам цӀендара, цул совгӀа, боккхийчарна а иштта кагирхошта а дика масал лу цар. Из болх бӀаргагуш волча хӀара сага безам отт, лостам бе ше вахача даькъ тӀа, ший цӀагӀа, шийна гонахьа. ХозагӀа деций цӀенача, хозача, цхьоагӀо йолча вахаш», - аьлар «Сердало» газетага цу къахьегама доакъашхочо. Администраце гӀишло латт эггара дукхагӀа нах лелача моттиге, тӀема сийлен шахьаре МагӀалбике. Къаьстта вай хьаьший терко тӀайодаш дош да, лостам болаш ГӀалгӀайчен мехкдаьтта столица хилар.