Молочанске хин гӀулакх тоадеш ба вай мехкахой
31.05.2024 16:05
ГӀалгӀайчен болхлой къахьегаш ба Молочанск яхача шахьаре, Спартаковски урам тӀара хий тоадеш, яхаш, дийцар «Сердало» газетага республикан гӀишлошъяра Министерстве.
«ГӀалгӀайчера хий тоадеш йола тоаба Молочанскерча Спартаковски урам тӀа хин турбаш тоаеш я. Цига хӀанз йолаш йола турбаш чӀоагӀа тиша я. Хий хьа ца доагӀаш хилара бахьанаш, цу турбашца дувзаденна да. Уж таояра болх дӀахьоргба 446 метр йӀаьхача моттиге», - йоах гӀишлонхоша хьабайтача хоамо.
Хьалхарча аргӀагӀа дӀадахьа дезаш да лаьттанцара балхаш. Укхаза, кӀаьд ца луш, къахьегаш ба болхлой, ма хулла сихагӀа из болх йистебаккха лаьрхӀа, бахархошта хий хургдола оагӀув теркал а еш.
