«Тӏаргим» яха кагирхой кхетаче хургйола ха хувцаеннай
«Тӏаргим - 2026» яха кагирхой дешара кхетаче вӏашагӏъеллараша хьакхайкадир из дӏаяхьарца хувцамаш долга. «Сердалога» баьча хоамах, укх шера из дӏахьоргья, маьцхали бетта 5-ча денгара 8-ча денга кхаччалца. Цу гӏулакха хьалхалаттараша белгалдечох, из тӏехьататтарах боаггӏача боараме кийчо е аьттув хургба дакъа лоацачар.
Цун программан юкъе я туризм, Даьхенцара лерхӏам чӏоагӏбеш бола болх, къамашта юкъе цхьоагӏо хилийтар, иштта гӏо деш йола тоабаш вӏашагӏйохкар. Къаман исторе лоархӏаме моттиг дӏалоацаш йолча гӏалашта юхе лекцеш ешаш, цӏихезача говзанчашца, СВО доакъашхошца кхетаченаш дӏакхухьаш, иштта Маьтлоама бухье боалаш, дӏахьоргда денош.
«Тӏаргим» яха кагирхой кхетаче тахан дуккхача къонабарашта керда наькъаш довзийташ, шоай проекташ йоаржае аьттув луш моттиг я. Россе тайп-тайпарча регионашкара начӏал дола, хьинар дола къона говзанчаш гуллуш моттиг я из. Хӏара доакъашхочун ший проект йоаржае, шийна хетар кхыбарашта дӏадовзийта, таханарча хано дӏадеххача тайпара мехкашта юкъера беркате хургйола проекташ хьаллаца аьттув ба цига. Дакъа лаца безам болчо ший дехар чудала деза проекта керттерча онлайн-платформага гӏолла.
