Наьсарерча студенташта дийцар, ӏадаташа зуламерча наькъех лоравеш хиларах
Хьехама кхетаче дӏахьош, Наьсарен-Шахьара сервиса, быта колледжа студенташта хьалхадаьккхар, мишта лораву ӏадатех вахаш вола саг воча хӏамах, яхаш, дийцар из болх вӏашагӏбеллараша.
Кхетаче дӏахьош яр Гӏалгӏай Республикан кагирхой гӏулакхех йола Комитет, иштта Российски «Дешар» яха юкъарло, кагирхошта юкъе харцахьара никъ лелабара духьалара хьехам беш.
Ийрча никъ лелабара духьалара ӏадаташ» яха лекци ешаш, кхелахой хьежар дешархошта юкъе дика дӏадовзийта, гӏалгӏай къаман тхьовра денз хьадоагӏаш дола цӏена ӏадаташ леладаро харцахьарча наькъах лоравеш хилар. Гӏалгӏай ӏадатех дац, шоай къаманца доагӏаш доаца ийрча гӏулакхаш леладар.
Кагирхой комитета бахархой-патриотически даькъа кулгалхочо Шоанахой Муслима къоастадир экстремизма духьалара керттера бокъонаш лелаяра хьал, цо терко тӏаяхийтар исторически дагалоаттам лелабар лоархӏаме хилара, иштта даьй культура лелае езара. Наркоманех волча говзанчас Овсажанаькъан Зураба довзийтар корта кегабеш йолча молхашта тӏехьавалара, ийрча никъ хьаэцара юкъера бувзам лоаттабеш йола оагӏонаш, уж дукхагӏча хана массехк сага цхьана леладеш дола ийрча гӏулакхаш да. Терроризма духьаларча комиссе (АТК) керттерча говзанчас дика кхетаргболча оагӏорахьа довзийтар кагирхой Интернете гӏолла терроризма наькъ тӏа боахаш дола гӏулакх.
«Чӏоагӏа дезал, боккхагӏбараш лархӏар, Даьхенцара безам, цӏена къахьегам - уж да ӏадатах дола мах бараш, Гӏалгӏайчен къам бӏаьшерашка уж лорадеш хьаденад. Ший къаман истори, цун овла сага боабеш хилча, циггара дӏадолалу харцахьара никъ хьаэцар а. Вай декхар да кагирхошта хьалхадаккхар, из чӏоагӏа кӏийле хилар, вай культуран овла из хилар», - аьлар Шоанахой Муслима.
