ИнгГУ студенташа толамаш даьхар кавказски къовсамашка
Гӏалгӏай паччахьалкхен университета тоаба дакъа лоацаш хилар Къилбаседа Кавказа федеральни куран вузашта юкъе дӏахьоча Кавказа къовсамех йолча ӏӏ-ча яхьашка. Кхетаче чуйоагӏаш яр «Къилбаседа Кавказа этноспортах дола къовсамаш» яхача проекта, из хьаллаьцар кагирхой гӏулакхех йолча Федеральни агентствос. Кавказа къовсамашта чудоагӏаш да массехк спорта тайпа хьагойташ йола Кавказа къамий культурни тӏехьале.
Яхьашка дакъа лоацаш хиннараша хьагойтар тайп-тайпара низ а, кадай хилар а, духьалъотталуш хилар а дӏадехаш йола къаман яхьаш.
Гӏалгӏай паччахьалкхен университета тоабашта чувоагӏаш вар массехк кийчо яь вола студент.
«Спортсменаша дика кийчо яьяр, цу тайпарча яхьашка, шоай вуз дикача толамашца гойтар духьа. Цудухьа толам баккха а цар таро хилар. Ведда гув тӏа воалаш ӏалихананаькъан Ислама кхоалагӏа моттиг яьккхар, хӏаьта кулгаш гӏортадеча шоллагӏа моттиг яьккхар Зангенаькъан Аслана. Тоабо хьалхара моттиг яьккхар муш озабеча даькъ тӏа, муша тӏагӏолла урагӏвахара даькъ тӏа кхоалагӏа моттиг яьккхар. Юкъара цар хилар кхолагӏа моттиг»,-аьлар «Сердало» газетага республикан керттерча вуза зарбан болх лелабераша.
Кавказа дукха оагӏонаш йолча къовсаме таро хилар мехка этноспорт дегӏайоалаярал совгӏа, вузашта юкъера бувзам чӏоагӏбе, Къилбаседа-Кавказа республикай тайп-тайпарча вузий студенташта юкъе говзал шоайла дӏа-юха эца.
Кагирхой гӏулакха йолча Федеральни агентствос белгалду, ӏадатий спорта оагӏонаш дегӏайоалаяр, Россе къамий культуран тӏехьале лораяр паччахьалкхен боарам тӏа эшаш хилар.
