ИнгГУ Халкъашта юкъерча олимпиаде дакъа лоацаш хилар Россера, доазол арахьара студенташ
Гӏалгӏай паччахьалкхен университете дӏайихьача Халкъашта юкъерча «Анатоми – из кхоллам ба» яхача сага анатомех йолча олимпиаде дакъа лоацаш хилар Россе тайп-тайпарча моттигашкара, иштта доазол арахьарча мехкашкара студенташ. Россе къамий цхьоагӏон Шера хетаяьча цу йоккхача яхьашка очни, иштта онлайн – оагӏонца дакъа лоацаш эзараш совгӏа къонабараш бар. «Сердалога» тахан из хоам кхаьчар университета болхлошкара.
Лорий ӏилмай кандидат, доцент, сага анатомех йолча кафедра хьалха латташ йолча Булгучанаькъан Мадинас кулгал деча оргкомитета доакъашхошта кийчъяьяр ийс оагӏонцарча тайп-тайпара дарех йола программа. «Ший ловзар», «ӏилманхо малагӏа ва хал», «Анатомически ловзар» яхача яхьашка шоай кхетама хьал тохкаш бар студенташ. Эггара халагӏчарех хилар цига «ӏаьржа яьшка». Кхоана лораш хинна дӏаотта безача студентий кулгаца хьежа, анатомически молха йовза езар, иштта латиний меттала цун цӏи яккха, из малагӏча гӏулакха эшаш я дӏадувца. Кхыйолча яхьашка пластилинах биологически хӏамаш хьаеш хилар къонабараш.
«Вахар лорадара тӏехьа къахьегараш» яхача тоабанна кхаьчар котало, шоллагӏа моттиг кхаьчар «Ялхлагӏа сакхувш хилар» яхача тоабанна, хӏаьта кхоалагӏача моттиге «Генезис» эттар. Гаьнарча оагӏонцара эггара чӏоагӏагӏа «SYNAPSE», «Аьттон факультет» хилар; «Пульс», «Concordӏa» яхача тоабашта дото майдилгаш кхаьчар, «Medvӏbe» борза майдилг елар.
Булгучанаькъан Мадинас цу яхьех дувцаш белгалдир, анатоми духхьал латиний терминех латта декъа ӏилма доацилга, из дийна кхоллам болга. Тайп-тайпарча мехкашкара студенташ дешара цхьан моттига тӏагулбеш, гӏулакх хилар цох.
Овшанаькъан Х.А. цӏерах йолча Лорий институте хилар толашагӏбараш кубкашца, дипломашца белгалбеш йола кхетаче.
