25 шу да Баркинхой Тамара дега дарба деш йола
Дега хирург йола Баркинхой Тамара къахьегаш хьайоагӏа 25 шу гаргга ха я. Тахан цо белгалдечох, наьха унахцӏено лораяра наькъ тӏа валар духхьал болх бе моттиг харжар дац, из гӏулакх дег чура дезаш, нахах дог лазаш, ди-бийса ца лоархӏаш, гӏо де кийча волаш хила веза из саг. «Сердало» газета интервью луш, Тамарас къаьстта терко еш дийцар дега-миашта оалача лазарех мишта лоравала веза.
Сага унахцӏено дика хиларца эггара лоархӏамедар волавенна лелар, маьженашка болх байташ хилар да. Хӏара дийнахьа гӏаш лелаш, дегӏага болх байташ хила веза саг, дего лерттӏа болх бергболаш. Волавалар, дегӏа маьженаш хьоаеш хилар чӏоагӏа лоархӏаме долга хьадувцаш латт, тхьоврача хана денз.
Моллагӏча лора лораде деза керттердараш белгалдир Тамарас. Могаш воацача сага дарба де оттарал совгӏа, цун дог теде, операци е дӏачувугача хана хула кхерам дӏабаккха, гаргарча нахаца царна оатто еш къамаьл де ховш, хила веза лор.
Из чӏоагӏа лоархӏаме да лора балхаца! Таханарча къонача лорашта дукха хӏама довз шоай балхах, хьинаре къахьега лаьрхӏа болаш из никъ дӏаболабераш кӏезига бац вай.
Баркинхой Тамарас унахой тӏаийбу тахан ИРКБ, «Унахцӏенон Академи» яхача клинике. Лакха говзал йолча, ший болх дика бовзача кардиохирурга тӏабаха, шоай дегӏа хьал тахка аьттув ба тахан мехкахой.
