ГӀо лоаттадеча ганзий кхо болхло белгалвир
ГӀо лоаттадеш йолча ганзий болхлой белгалбеш, кхетаче хилар Россе МЧС. ВӀашагӀкхетара хьалхаоттар Россе МЧС оагӀон кулгалхо волча Куренков Александра тӀадиллар ший гӀончанна Бутко Вячеслава. 2024-ча шера шоай балха тӀа белгалбаьннача къахьегамхошта совгӀаташ делар кхетаче.
Республикерча МЧС зарбан болх лелабераша беча хоамах, белгалбаьрашта юкъе ба вай мехкарча гӀо лоаттадеча ганзий болхлой. Уж ба Дудурганаькъан Руслан, Йовлой Мухьмад, Беканаькъан Мухьмад. Кхыча паччахьалкхенашта новкъостал лоаттадеш белгалбаларах, лоархӀаме грамоташ елар къахьегамхошта.
«Россе Президента, Паччахьалкхено баьча соцамах, дӀадахача шера Россе МЧС, доазол арахьарча 13 паччахьалкхенна новкъостал деш, 20 операци дӀайихьар. Россе МЧС авиаце рейсашца, гӀо эшача мехкашта 830 тонн хӀамаш яхьийтар. Цу юкъе бар кхача, вахаре хӀара дийнахьа эшаш йола хӀамаш, 630 тонн яр гӀо лоаттадеча ганзаша кийчъяьраш. Доазол арахьарча мехкашта гӀо эшаш нийсделча, Россе МЧС, гӀо лоаттадеча ганзашца цхьана, вӀаштӀехьабоаккх из болх», - белгалдир республикерча Россе МЧС болхлоша.
