«Бейни-2024» яхача туристий лагеро салаӀийтара хьалаш тоадеш латт
«Бейни-2024» яхача Кагирхой дешара лагере дика таронаш я роуп-джампинге (мушаца чукхоссаваларе) шоашта фу карагӀдоал хьажа. Цу тайпара барт бир, дукха ха йоацаш, Кагирхой центра кулгалхочо Ведажанаькъан Зоврбика, 23BLOCK яхача роуп-джампингах йолча команда викалашца, яхаш, дийцар «Сердало» газетага ГӀалгӀай Республикан туризма, кагирхой политикан Министерствон зарбан болх лелабераша.
Кагирхой даькъ тӀа эггара дукхагӀа сатийса оагӀув я из. 10-ча денгара 25 денга кхаччалца, чаьтарий лагере 12 шера болх баьча говзанчаша берий лоамашкара салоӀама ха цӀаккха а йицлургйоацаш ергья.
Кагирхой, лаьрххӀа долча мушашца чукхувсалургба, геттара лакхача моттиге гӀолла чакхбоалаш.
«Из лаьрххӀа дагадехад цига салоӀача наха сакъердам хургболаш, цо вай мехка туристически хьал чӀоагӀду, наьха терко дикагӀа тӀаоз», - аьлар ДМО кулгалхочо Ведажанаькъан Зоврбика.
Белгалдаккха деза, 23BLOCK роуп-джампинга, Россе хьалхара моттиг дӀалоац, эггара лакхагӀча моттигера чукхоссаваларах - 480 метр. ХӀанз уж керда толамаш даха лаьрхӀа ба республикан ЦӀай-лоам тӀа.
