Къаман ТЮЗе гулбелар, «Дегаза боабашк» яхача спектаклага хьажа
Гӏалгӏайчен берий Театре гойтаргья «Дегаза боабашк» яха спектакль, из оттаяьй С.Озерскаяс.
Цунга хьажа гулбелар тайп-тайпарча дешара моттигашкара ондаргаш - ӏаьлий-Юртарча дукхача доакъоех латтача лицея, столицерча «Марем» гимназера дешархой, иштта могашал яйна бераш, Донбассе дӏахьош йолча лаьрххӏача операце доакъашхой дезал.
«Белгалду, цхьа дакъа хьожаш хиннараш цига бахкар дар «Пушкински картах», цар шоашта хьалхашка хьайийллар лоархӏамеча театра искусствон дикагӏа йола оагӏонаш. Спектакло самукъадаккхарал совгӏа, кӏоаргга хьехам балара оагӏув а гойтар. Къонача хьажархоша никъ бир турпалхочунца цхьана хьал довзара даькъ тӏа, царна дайра вахарера лоархӏаме дола гӏулакхаш. Боккъонцахьа бола фаьлг - из хоза гойтам хинна ӏац, из ба хьаькъале хьехамча, берашта новкъостал деш, мах бараш лахара: дикал, шоаш ма дарра тӏаэцар, лерхӏаш дар кхоачашдара тӏехьа хилар», - аьлар Гӏалгӏайчен ТЮЗе «Сердало» газетага.
Зӏамига хьажархой кхаьчар кхыча дунен тӏа. Хоза кийчъяь спектакль, классически истори гойташ йола моттиг, йовхьамаш ловзаерашта тӏабувха гӏирс, фаьлга ханаш гойташ кердадаьккха хинна деррига сурт, иштта цунца нийслуш дӏахьош хинна мукъам берий дог гӏоздоаккхаш бар, беррига теркам тӏабохийташ цу гонахьарча хьала, цудухьа дицлургдоацаш хилар царна из ди.
