Наркотикаш йохкарашкара кийла хиллал «синтетика» хьаяьккхар
Наркотикаш йохкаш волча шин сагагара кийла хиллал «синтетика» хьаяьккхар, яхаш, дийцар «Сердало» газетага республикан МВД.
«ГӏалгӀай Республике гӀолла йолча МВД наркотикашта тӀехьожам лоаттабеча урхаллен болхлоша лаьцар 26 шу даьнна Эккажкъонгий-Юртара шиъ вахархо. Уж чубаьгӀа Lada Granta автомобиль соцайир полице Наьсарен кхален Аьлтий-Юртарча даькъ тӀа Коталон 70 шу дизара урам тӏа. Чухьежача, царех цхьанне кисара хьаяьккхар 29 грамм мефедрон, хӀаьта цунца хинначунгара 7 грамм клефедрон. Цул совгӀа, машина чу хьежачул тӀехьагӀа, полице болхлошта корайир машина хьалхарча гӀанда тӀара 237 грамм корта кегабеш йола молха», - аьлар хоамо.
Иштта, из болх дика дӀахьош, хьем боацача амала болхлоша белгалдир цу наха Шолже-МагӀалбик наькъа йисте гӀолла массехк къайлагӀара моттиг хьаяь хиннилга. Полице жӀали а долаш дӀабихьача балха корайир кхы а 700 грамм синтетически наркотикаш. Цхьа кийла гаргга хилар уж. Бокъонаш лораеча болхлоша шоай болх ханнахьа, дика дӀабахьарах, из зулам нахага дӀа ца кхоачаш дисар.
ГӏалгӀай Республике гӀолла йолча МВД тохкама урхаллено цу наха духьалара уголовни гӀулакхаш
хьадийллад РФ Уголовни кодекса 30, 228.1 статьяй кӏийлен тӏа, уж дерригаш цхьа гӀулакх санна тохкаш да. Зуламхой чубехкаб. Тохкам дӀахо дӀахьош ба.
