Россе Турпала цӀи елар, ший тӀема новкъост кӀалхарвоаккхаш, кхелхача вай бӀухочоа
ТӀема операцен юкъе кхелхача, 28 шу даьннача бӀухочунна Хьоашаланаькъан Адама Султана Россе Турпал яха цӀи елар Россе Президента. Деналца ший декхараш кхоачашдеш, берригача мехка цӀихезача Хьоашаланаькъан Ювсапа Султана даь- веший воӀ вар из.
ВоккхагӀвола сержант Сайгин А. А. кӀалхарвоаккхаш, вахар хаьдад тӀалаташ йолча тоабанна кулгал деш хиннача вай мехкахочун. Ахкан шоллагӀча бетта 30-ча дийнахьа Донецкерча Старомайорское яхача юрта хилар из. ЦӀаьхха, чухьийлхача моастагӀчох дӀахьулаве, аьнна , ког лозабаь ший тоабан юкъера бӀухо кӀалхарваккха эттар из. Цу моттиге валар хилар вай мехкахочун.
«Хьоашаланаькъан тайпан шоллагӀа вола Россе Турпал ва Ювсапа Султана даь-веший воӀ вола Адама Султан. Иштта бола къаман бизза къонгаш массанена масал да. Яхь, денал, майрал долаш лаьттача къаман къонгий цӀераш вай дегашка массахана яхаргья!» - белгалдир вай Мехкадас, РФ Президента кулг яздаьча амарах дувцаш.
