Вахарцара къаьстар ДПИ гӏорваьнна хинна Гӏалгӏайчен пхьар Чуранаькъан Ювсап

«Тха новкъоста кхоллама говзал, оалилга доацаш, йоккха яр. Наггахьа мара нийслуш доацача жовхьарах тарра, Ювсап хӏара ший кхоллама оагӀонца къегаш вар, хӏара ше беча балха чухьа вахар из. Хӏама кхолла магар – из малхавоалаш денна совгӏат да, из нийсде йиш я Ӏалама хозалца е тамашийнача оазаца. Дала денна начӏал дегӏакхувла йиш яле, амма ший лоӏамагӏа из кхолла низ кхоачаш вац саг. Чуранаькъан Ювсап цхьа дакъа денна саг хилар гуш дар из зӏамига волча, гонахьара дуне довза волалуча хана. Из яр ший тайпара, малх кхета, дунено лу бера дог дизза йола хоза моттигаш гонахьарча нахаца из екъа гӏийрта ха. Къаьстта цу хана зӏамигача Ювсапа дег чу сомаяьлар шийна гур кхолламга гӏолла нахаца декъа безам бола уйла», - йоах РДНТ директора Зурабанаькъан Ахьмада.

Говзанчан вахара никъ аттагӏчарех бацар. Дуккха хала моттигаш нийслора цо хьабахьача новкъа, амма цун кхолламцара безам юхабаккха, цунна сунт тоха могаргдолаш низ бацар. Цо дӏахо а къехьегар, ший кхолламца къонача ноахалашта дезалургдола керда балхаш хьакхоллаш. Цо кхелла хӏамаш гӏалгӏай кулгкарарча къахьегама бокъонца дола жовхьараш а хинна дӏадахад, хӏаьта шийга кхаьча йоккха говзал цо, кхо ца еш, дӏалора тӏехьа тӏакхувш болча ший ӏамешта-дешархошта. Цу хьакъехьа цкъа яздаь Ӏийнадацар тха газет.

Говзача пхьара лир доага сурт-сибат даим а даха дусаргда, из вовзаш мел хиннарий дегашка. Ювсапа кхолламо дӏахо а дегаш ураувттадеш, керда пхьараш кхебергба, хӏаьта цох бола дагалоацам цӏаккха биц ца болийташ хургда цо кхелла балхаш.

Дала къахетам болба цох, Дала гешт долда цунна! Вийрза моттиг Дала даькъала йойла цун!