2024-ча шера культуран 5 моттиг тоаеш, хьалъеш болх дӀабихьар мехка
2024-ча шера «Культура» яхача къаман проектага гӀолла тоадир Йоккхача Ачалкхера, Ӏаьлий-Юртара культуран цӀенош, Магасера кинон, театран моттиг. Иштта керда культуран цӀа хьалдир ЖӀайрахьа, дӀахохьош латт Магасе паччахьалкхен филармони хьалъеш бола болх. 273 млн сом ахча да цу гӀулакха хьакъоастадаьр. Из хоам «Сердалога» бир гӀишлон балхех йолча Министерствос.
Деррига балхаш йиллача хана кхоачашде аьттув баьннаб. Шинна юртарча культуран цӀеной наӀараш, кораш хийцар, тӀера куц эргадаьккхар, кӀалхара кӀийле, тока лини хувцаш къахьийгар. Коа керда плитка юллаш, отмосткаш йир.
Магасерча кинон, театран моттиге боккха болх дӀабихьар, чура моттигаш хувцаш, иштта наӀараш, кораш хийцар, йӀовхала турбаш, деррига гӀирсаш хийцар. Оазаш дӀаязъе лаьрхӀа моттиг къоастайир.
ДӀадахача бӀаьшарен 60-ча шерашка хьалъяьча гӀишлон меттел; керда, хоза культуран цӀа урагӀдихьар лоаман юрта. Дуккхача шерашка цу моттига кулгал деш хьаенача Цисканаькъан Тамарас дувцаргдар, мел чоалхане, Ӏоткъаме никъ ба болхлой тоабо укх дӀаьхача шерашка, цхьаккха паргӀато йоацаш, хьабенар. ХӀанзчул 13 шу хьалха харцар кхерам болча хьале кхаьча дар ЖӀайрахьара культуран цӀа, хӀаьта тахан уж еррига халонаш тӀехьашкахьа йисар.
«Кхозза вӀаштӀара даьча цӀагӀа 250 моттиг йола хьажархой зал я, иштта библиотека, кружокашта, секцешта лаьрхӀа классаш, гримёрни, барзкъаш хьалъувхка, хӀама даа, хьаьший тӀаийбе моттигаш», - дийцар тхога гӀишлон балхех йолча Министерствос.
