«ДӀахохьош да вай ишколаш цӀенхаштта тоаяр. Шин шера программа кхоачашъеш, 2021 шера Россе Президента оттадаьча декхарга хьежжа, 31 гӀишло тоаяьй, карарча шера кхы а ялх ишкол тоаергья.

Царех я Наьсарен №1 йола гимнази, Илдарха-ГӀалан №1 йола гимнази, Магас-Шахьара «Марем» яха гимнази, Магас-Шахьара лицей-берий беш, Буро кӀалхара №2 йола юкъера ишкол, Лохерча Ачалкхера могаш доацача берашта цахаддаш кхетам балара йола Центр», - аьлар Келаматанаькъан Махьмуд-Ӏаьлас, ше керттерча декхарех дувцаш.

Махьмуд-Ӏаьлас иштта белгалдир, уж балхаш дӀахьош, дукха декхараш кхоачашде дезаш хилар. Цу тайпара, дешара моттигаш цӀенхашта тоаяра балхаш деча хана, керда гӀирс оттабарал совгӀа, дика хьалаш вӀашагӀдохк дешара тӀакхувш хургболаш, цу даькъ тӀа толамаш доахаргдолаш.