Ӏаьлий-Юрта кхозза вӀаштӀара яь ишкол хьалъяь яьлар
13.11.2023 15:40
ГӀалгӀайчен Ӏаьлий-Юрта, «Юггазстрой» яхача гӀишлонхой фирмо, «Дешар» яхача къаман программанна чуйоагӀаш, массехк бӀаь моттиг дӀалоацаш йола ишкол хьалйир, яхаш, хоам бир «Сердало» газетага гӀишлонхоша.
«Йоккха дешара моттиг хьалъе йолаяьяр 2021 шера гурахьа республикан гӀишлошъяра министерствон лоӀамах. ГӀишлонна тӀахьожам лоаттабер я «ГӀалгӀай Республикан капитальни гӀишлошъяра урхалле» яха ГУП.
Кхозза вӀаштӀара яь, кхаь даькъа йийкъа йола гӀишло лаьрхӀа я 700 дешархочоа. Из проект кхоачашъяра хьожадаь ахча дар 595 млн сом»,-аьлар хоамо.
Укхаза материально-технически хьалаш хьакхеллад, берашта эшаш йола дешара таронаш я. ГӀалгӀайчен кхыйола керда ишколаш санна, ер а таханарча заман чухь хила йоагӀача беса хьалъяьй.
