«Каьзи» яхача лагере альпинизмах йола Россе Чемпионат дӀахьоргья
Тушола бетта 10-ча денгара 20-ча денга кхаччалца, ГӏалгӀайчен Жӏайрахьа кхале хургья чоалхане хьал дезарий моттиг - укхаза дӀаяхьа лерхӀ альпинизма технически классах Россе Чемпионат. Цох дийцар республикан Кулгалхочо Келаматанаькъан Махьмуд-Ӏаьлас ший бувзама оагӀонашка.
Яхьашка гуллургба чӀоагӀагӀа бола Пермьера,Челябинскера, Краснодарера, Краснорскера, Нижний Новгородера, Воронежера, иштта кхыча шахьарашкара альпинисташ. Цига вӀашагӀкхета тарлуш я 15-17 гулъяь тоабаш.
«Хӏанз пхезлагӀа дӀахьош я цу тайпара йоккха кхетаче вай ГӏалгӀайче.
Тайп-тайпара альпинизма наькъаш хиларо таро лу спортсменашта шоашта ловш бола боарам болча лакхача лоам тӀа бала», - аьлар мехка Кулгалхочо.
«Каьзе» альплагера хьалаш хилийта Ӏалашо ергья хьабаьхкача наха паргӀата хургйолаш: уж Ӏе йиш йолаш хургба лаьрххӀача чатарашка а иштта йӀайхача вагончикашка. Царна лаьрхӀа хӀама яара, салаӀара, дегӀах хий кхарзара, интернетаца болх бара йола моттигаш Ӏалашъяьй, цо таро лу яхьаш дика дӀаяхьа.
