Культуран цӏа цӏенхаштта тоадеш латт Алхасте
Алхастера Культуран цӏа тоадеш бола болх тахан 50%-га кхаьчаб ала йиш я майрра. «Дезалера лоархӏамедараш» яхача федеральни программан «Дезал» яхача президентски къаман проектага гӏолла дӏахьош болх ба из. 15 млн сом гарга ахча да цу гӏулакха хьахьожадаьр. Беррига болх ардара бетта чакхбала безаш ба, юххьанца дийцачунга хьежача.
«Алхастера бераш таханарча ханага хьежжа тоадаьча культуран цӏагӏа шоай начӏал чӏоагӏдеш, цхьацца говзал караерзаеш, кхоллама балхаш деш хилар деза тхона. Даьй, ноаной а аьттув хургба тӏаккха, шоай берий кхоллама балхашка хьажа. Бахархошта а тахан лоархӏаме кхетаченаш дӏакхахьа, цӏайш дезде моттиг эш.
Культуран цӏа яхар чӏоагӏа эшаш моттиг я юрта. Цунга хьежжа, болх чакхбаккхарал совгӏа, цу цӏен декхараш биззача боараме кхоачашде аьттув хургболаш къахьега деза», - язду ший телеграм-оагӏон тӏа вай мехкадас Келаматанаькъан Махьмуд-Ӏаьлас.
Алхастерча культуран цӏагӏа, цӏихезача культуран болхлочо Боканаькъан Заретхана кулгал деш, къахьегараш лакха начӏал дола нах ба. Говзал йола къонабараш гуллуш йола, цар шоай гӏулакх дикка карадерзаду моттиг хьахиннай цох. ДК кхедаь бераш тайп-тайпарча кхетаченашка, республикан, федеральни яхьашка дакъа лоацаш хул.
