Алхастерча дешархошта дийцар, терактах лорабалара бокъонех Гӏазданаькъан Ахьмад
Терроризма, экстремизма кхерамзлен профилактика еш болх дӏабихьар Алхастерча культуран Цӏен болхлоша моттигерча ишкола-берий беша даькъ тӏа. Цу кхетам балара вӏашагӏкхетара керттера бахьан дар, кхувш йоагӏача тӏехьенна хьалхадаккхар, терроризмах хьадоала во доккха долга, царна ховргдолаш сага вахар мел мах болаш да. Кхетаче вӏашагӏъеллаяр шоайла тешаме къамаьл деш болх дӏабахьара, цига дийцар лоархӏаме дешаш.
«Гулбеннарашта хьалхашка къамаьл дир культуран Цӏен болхлочо Загӏенаькъан Адама. Цо бераш кхетаргдолаш довзийтар терроризма ийрча гӏулакхаш, царех хьадоала зуламаш. Цо белгалдир, дукха нах гулбеннача моттиге, хьисап долаш, лоралуш хилар эшилга, иштта хьалхадаьккхар моллагӏа дола харцахьара гӏулакх даь саг уголовни бехктокхаме озаш хилар», - аьлар «Сердало» газетага из кхетаче вӏашагӏъеллараша.
Дӏахо къамаьл дир хьехархочо Гӏаппархой Руслана. Цо берашца цхьана даьшхар зулама наькъаш; нагахьа санна унзара хьал нийслойя, хьалхарча аргӏагӏа ха дезар белгалдир. Хьехархочо берашта хьалхадаьккхар сихача новкъостала телефон ха езилга хӏара сага, цо иштта царна гойтар, да воацаш бола гӏирс шоашта корабойя, е дегабуам беш ара хӏама нийсделча, урам тӏа, шо чу долча моттиге из хуле, цох сиха хоам бе безилга.
Лакхерча классашка даьгӏа бераш дика дакъа лоацаш дар цига. Хьехархошца цхьана царна дагаухар дӏаяхача ханашка нийсъенна уж чоалхане моттигаш, террористаша даь зуламаш. Кхетаче дӏахьош царна гойтар цхьацца йола тематически оагӏонаш, царга лаьрххӏа хьежар, уж вӏашагӏтехаяр кхерамзлен кхелахоша.
