Шолжа кхален Берий кхоллама ишколе йийлла урок дӏайихьар
23.01.2026 09:49
«Къаман сцена тӏара халхар» яхача дешара оагӏонцара йийлла урок дӏайихьар Шолжа кхален Берий кхолламах йолча ишкола халхарий моттиге. Дешархошта хьалха даьккхар, гӏалгӏай къаман халхар цун ӏадаташца дувзаденна, из оагӏув белгалбеш хила дезилга.
«Йийлла урок йолча хана, бераш сатем байна хул. Дас, нанас дечал чӏоагӏагӏа саготдеш хул бер ше. Халхарех болча оагӏонца иштта йола урокаш каст-кастта дӏакхухьаш я. Царга гӏолла гуш хул бера фу дӏаийцад, шаьрдаьд, малагӏа моттигаш кхы а тоае езарех я», - дийцар «Сердалога» ишкола кулгал деча Боканаькъан Паьтӏамата.
Урок берригаш раьза болаш дӏаяхар. Шоаш леладер ма хулла хозагӏа, дог айдергдолча тайпара дӏахьокха гӏерташ, беррига низ тӏабахийта кхестар бераш сцена тӏа.
