Долакха-Юрта мехкашта юкъера ший лоӀаме кӀалкхетаргах латара яхь хилар
Долакха-Юртарча берий-ондаргий спортивни ишколе мехкашта юкъера ший лоӀаме кӀалкхетаргах латара яхь дӀайихьар 18 шу даьннарашта юкъе, яхаш, дийцар «Сердало» газетага из болх вӀашагӀбеллараша.
«Доккха цӀай хьатӀадоагӀаш, ГӀалгӀай мехкара, Нохчашкахьара, Селашкахьара 140 совгӀа спортсмен вар шоай профессиональни говзал гойташ. Цига дакъа лаца бийхабар 2009-2011 шерашка баьраш. Къовсамий чаккхенга ладийгӀача, котбаьннарашта юкъе хилар Тоачанаькъан Амир, Гаркхой Адам, Ӏаьленаькъан Мухьмад-Басир. Осменаькъан Мансура, Баркинхой Ювсапа, Темарханаькъан Микаила боарза совгӀаташ даьхар. Цар цу яхьанга кийчо яьяр шоай хьехамчаца Гаркхой Шамалаца, Акхасаганаькъан Микаилаца», - аьлар хоамо.
Тоачанаькъан Амира «Дика техника гойтарах» яха къаьстта совгӀат делар.
Цул совгӀа, Долакха-Юртарча берий-ондаргий спортивни ишколо тоабашта юкъе хьалхара моттиг яьккхар.
