Долакха-Юрта хилар «Наркомани - каша вуга никъ» яхача хьехама кхетаче
Долакха-Юртарча культуран ЦӏагӀа кхетаче хилар «Наркомани- каша вуга никъ» яхача темах, из вӏашагӏъеллаяр моттигерча ишколай дешархошта лаьрхӀа. Кхетаче дӀахьош хилара бахьан дар, дешархошта довзийтар наркоманех хьадоала зе. Из лоархӀаме дош дувцача дакъа лоацаш хилар депутат Аькхенаькъан Дауд, юкъарлон болхло Геласханаькъан Бембулат.
«Цига дийца керттера дош дар, кхувш йоагӀа вай тӀехье воча хӀаман тӀехьацаялийтарца, ийрча вахара никъ хьаэце шоашта хургдар хьалхадаккхарца дувзаденна. Берашта, къайле йоацаш, довзийтар цох хьадоалаш дола зулам, царна хьийхар де дезар - чӀоагӀо йолаш ала «ак», нагахьа из ала дезача гӏулакх кхаьчадале. Наркомани из во оамал хинна Ӏац, цо йохаю сага могашал, сий, кхоане. ГӏалгӀайче даим мах болаш хьадоагӀа дег чура цӀена, низ болаш, воча хӀаман духьалъотта могаш, ший дезалашта, ший наха хьалхашка бехктокхаме волаш хилар, наркотикаш из деррига дохадеш я овлангара денз», - аьлар «Сердало» газетага из болх вӀашагӀбеллараша.
Наркотикаш саг чӀоагӀагӀа веш яц, цар хетийт деррига атта долаш санна, бакъда цун тӏехьадоагӏа из саг физически хӏалаквар. Цу тайпарча кхетаченаша таро лу кагирхошта хьалхадаккха водар малагӀа да, Ӏадаташ лорадара никъ мишта хила беза.
