Мехкарча шин моттигера хий тоадеш болх дӀахьоргба
03.07.2025 09:33
Илдарха-ГӀалий тӀа, Берда-Юрта 20 км йола хин турбаш меттайоалаеш, болх чакхбоаккхаргба. Из хоам «Сердалога» бир мехкадаь зарбан болх лелабераша. 45 эзар совгӀа нах бахача цу шин моттиге, йоккха юкъ ялалехь, боаггӀача боараме хий долалургда.
Укх ханага кхаччалца мел хинна кхоачамбоацараш тӀехьашка дисарах аттача даргда бахархой вахара хьал. Белгалде деза, цу мугӀарера болх Келаматанаькъан Махьмуд-Ӏаьлас ше тӀахьожам лоаттабеш, йиллача хана болх чакхбаккхар лоархӀаме долаш, дӀахьош болга.
