Суртанча хиннача Ӏоахарганаькъан Хьаж-Бикара хетаяь кхетаче дӀайихьар Фуртоуге
Ӏоахарганаькъан БӀаче Хьаж-Бикара кхолламах дувцаш йола кхетаче дӀайихьар лоаман юрта Фуртоуге Ӏилма-тохкама института болхлоша. Из хоам «Сердалога» бир цу моттига зарбан болх лелабеча БӀарахой Мадинас.
«Из болх дӀахьоча гӀо деш хилар Россе антропологий, этнологий Ассоциаце моттигера болхлой, Малсаганаькъан Тухана цӀерах йола мехктохкама музей, Ӏоахарганаькъан Г. С. цӀерах йола Мемориальни ЦӀа-Музей. Юкъарлен, Ӏилман, дешара, культуран моттигашкара 60 совгӀа саг гулвеннавар кхетаче дакъа лаца»,- йоах тхога бенача хоамо.
20 сага докладаш йийшар цига, цул совгӀа, Ӏоахарганаькъан Хьаж-Бикара гӀалгӀай истореца, культураца, этнографеца бувзабенна дӀабихьача тохкама балхах дийцар гулбеннараша. ЛаьрхӀар, цо мел баьча балхах дувцаш бола гуллам арабаккха, иштта «ГӀалгӀай гӀарчош.
1924» яхача кулгаца яздаьча альбома юха кепа тоха, интернете гӀолла цун сурташ, гӀарчошцара болх, иштта кхыдола балхаш довза йиш хургйолаш гойтама проект вӀашагӀйоллаш болх дӀахьо. Къилбаседа Кавказерча музейшка гӀолла, лаха деза суртанча балхаш.
Цул совгӀа, кхетаче хьоахадир, Ӏоахарганаькъан Г. С. сийленг РФ къамий культуран оагӀонцарча паччахьалкхен реестра юкъедахьара гӀулакх республикерча Паччахьалкхенна тӀадахьарах.
Истореца ювзаенна йола юрт Фуртоуг дийнъяр а лоархӀаме моттиг дӀалоацаш да къаман вахаре. Республикерча Паччахьалкхен тӀахьоргда из дош кастта.
