Дерригача дунен туризма ди дездеш хургба лоамашка
Жӏайрахьа кхален эггара хозагӏа йолча моттиге дерригача Дунен туризма денна, ахканара туристически зама дӏакъовлара хетадаь доккха цӏай хургда. Тов бетта 27-ча дийнахьа Лейми яхача юртарча «Оаздик» берий-кагирхой лагера доазон тӏа дӏахьоргда из.
Цу оагӏонцарча гӏулакхех йола министерство я цу балха хьалхаэттар. «Программан юкъе хургья спортацара яхьаш, квадроциклашца гобаккхар, гӏаш лелар, экскурсеш, иштта кхыдараш а. ӏуйран нийсса итт сахьат даьлча, дӏадоладергда из деррига. Цул тӏехьагӏа, Паччахьалкхен филармоне артисташ юкъе болаш; концерт хургда цига.
Вай мехкара къаман артистка, КБР, КЧР цӏихеза артистка Ӏаьленаькъан Ӏайна, Мусенаькъан Ӏайна, Йовлой Хади, Олиганаькъан Марем, Хьоашаланаькъан Лолита, Акхасаганаькъан Мовсар, Овшанаькъан Зара, Пхьугой Амир хургба цига баьхка. Иштта «Дега оаз» яха рок-тоаба, «Гаргареи» яха халхара ансамбль хургья концерта юкъе дакъа лоацаш», - йоах «Сердалога» культуран, тризма гӏулакхех йолча Министерствера бенача хоамо.
Бахархой, мехка гӏолла гобоахаш лелараш, иштта кхыбараш гуллуш доккха цӏай хургда цох.
Белгалде деза, туризмаца дувзаденнараш вай мехка хӏара денна тоадеш латтилга. Ахканара туризма болх дӏакъайла, лоаман моттигашка ӏан хана салаӏа ловраш тӏаэца кийчо е болалургба мехка.
